اسئلة بديهية ملهاش لزمة بس بتتسأل !!!

في اسئله بديهيه مالهاش اي لازمه في الدنيا
بنتعرض ليها كل يوم من كل الناس

مثلا

أنت في أوضتك .. على السرير وطافي النور ومتغطي .....
يجي أخوك الظريف ويفتح الباب عليك ويقول : ايه ده انت هتنام ولا ايه ؟
(( أظن ده مش وضع الرقص !!! واضح ان انا هنام))

أنتم معزومين عند ناس ورحتو لبيتهم وأول ما فتحولكوا الباب يقول ابنهم الصغير " انتوا جيتــواااااااااااااااا

(( لا لسه ))

والعكس : أنت لابس هدومك و متأنتك و على سنجه عشره وريحة البارفان واصله لاخر الشارع .. وخلاص بتفتح باب الشقه,, يجي حد من أهلك وينادي بصوت عالي : انت خااااارج ولا اييييييييييه

(( !!! لاء ده انا لسه راجع ))

أو مثلا راكب العربيه ودورتها وخلاص هتطلع ... يجيلك لك البواب ويخبطلك على الزجاج,, أنت بكل ذوق تفتح الزجاج وتقوله : خير في حاجه؟
يقولك : انت رايح الشغل يابيه ؟

(( لا العربيه واحشاني ))

مثلا ماسك سماعه التلفون وقاعد تدوس على الارقام يجي حد من أهلك ويقولك : انت هتتكلم في التليفون ؟

(( لا أبتفرج عليه ,, أكيد بتكلم ))

مثلا : ماسك ملزمة أو كتاب وقاعد تحفظ ومتحمس (أول مره بقى) .. جه حد وقالك :ايه ده انت بتذاكر؟؟؟
(( تقوم رامي الكتاب و تقوله لااااااااء ))

ربنا هاديك كده ... ماسك سبحه و عمال تسبح ، يجي حد من البيت يعدي عليك ويقول :هوه انت بتسبح
(( لاء هفرطها و أسلقها ))

ولا تعالــو شوفو قنواتنا واسئلتهم البايخه

برنامج اهداءات يتصل واحد يطلب أغنيه
ترد عليه الذيعة بكل خفه ورشاقه : أنتا بتحب الاغنيّة دى ولا ايه ؟

(( لاء طالبها اخنق على نفسي))

ههههههههههههههههههه اه الاستاذ قبل كده كان بيقلنا على الحاجات ده ... زى مثلا اول ما تدخلى ..... حسن انت جيت .... لا لسه مجتش لما اجى هبقى اقلك

او اعدة مثلا فى الاودة واختك تدخل عليكى وتقول انتى هنا؟ لالالا هناك بس جاية حالا حاجات تحفه على فكره وفى مواقف زى ده كتييييييييييييير

الحاجات دي فعلا كانت منتشره زمان بصورة اكبر بكتير من دلوقتي ... لانها لما بتحصل دلوقتي ... يا عيني عالتريقه
ويمكن كانت موجوده زمان عشان الناس تفتح مع بعضيها كلام
يعني انت جيت .. اه جيت .. طب كنت فين .. مع مين .. بتعمل اي .. كدا
وخاصة لو ام بتسأل ابنها ... هيتفقس هيتفقس

بس حتى لو مش فى اى حوار عايز يتفتح برده الاسئلة دى بتتسأل متفهمش بقى زياده تأكيد و لا ايه؟؟
و فعلا يا عينى على التريقه اللى بتحصل
شكرا على الرد و المرور Smile

هههههههههههههههههه.......فعلا انا ممكن امسك كتاب وذاكر وامى تيجى وتقول انت بتذاكر اقوم قافل الكتاب وقول لا مش بذاكر

تمام اوى يا عسولة من الاخر زى الفل

جميييل اوي يا عسل طيب اقولكمعلى حاجة ومتتريقوش لسة كنت فى الكلية يوم الاحد دخلت اوضة اسال على دكتور قمت سالت عليه دكتور اخر قام دورلى عليه فى جيبه وقعد يضحك معايا ههههههههههه بس والله ماكنت اقصد ذلك كنت اقصد انه يشوفوه فى الاوضة الداخلية